अक्टोबर ७, २०२३ मा इजरायलको किबुज अलुमिममा हमासद्वारा गरिएको आक्रमणमा परेका नेपाली विद्यार्थी बिपिन जोशी अझै पनि बेपत्ता छन्। त्यही हमलामा परेका थाई नागरिक नत्तापोंग पिन्टाको शव हालै गाजाबाट बरामद गरिएको पुष्टि इजरायली रक्षा बलले गरेको छ। तर बिपिनको अवस्थाबारे अझै पनि कुनै ठोस जानकारी सार्वजनिक भएको छैन।

उक्त किबुजमा ‘Learn and Earn’ कार्यक्रम अन्तर्गत १७ जना नेपाली कृषि विद्यार्थी कार्यरत थिए। हमलामा १० जना नेपाली विद्यार्थी मारिए, ६ जनाको सकुशल उद्धार गरियो। एक मात्र बाँचेकामध्ये बिपिन जोशीलाई हमासले अपहरण गरेको पुष्टि इजरायली सेनाले गरिसकेको छ। उनी हालसम्म हमासको नियन्त्रणमै रहेको विश्वास गरिन्छ, तर उनको अवस्थाबारे विस्तृत विवरण — जस्तै स्थान, स्वास्थ्य अवस्था, वा सम्पर्क — उपलब्ध छैन।

इजरायली सुरक्षाकर्मीहरूको अनुसार हाल गाजामा ५५ जना मानिसहरू अझै अपहरणमा छन्, जसमा बिपिन पनि पर्छन्। तीमध्ये ५४ जना अक्टोबर ७ कै दिन अपहरणमा परेका हुन् भने १ जना पहिलेबाट हमासको कब्जामा थिए। इजरायलका रिपोर्टहरू अनुसार, ती ५५ जनामध्ये कम्तीमा ३२ जनाको मृत्यु भएको आशंका गरिएको छ, भने २३ जनालाई जीवित रहेको अनुमान गरिएको छ।

कञ्चनपुरका २३ वर्षीय बिपिन जोशी सुदूरपश्चिम विश्वविद्यालयका कृषि विद्यार्थी हुन्। उनी अध्ययनका सिलसिलामा इजरायलको किबुज अलुमिममा कृषि अभ्यास गरिरहेका थिए। घटनाको दिन साथीहरूको ज्यान बचाउन उनले हातमा रहेको फलफ्लोर काट्ने उपकरणले हमलाकारीहरूसँग प्रतिरोध गरेका थिए भन्ने कुरा उद्धार गरिएका साथीहरूले बताएका छन्।

उनको परिवार, नेपाली सरकार र विभिन्न अन्तर्राष्ट्रिय संस्था उनको खोजी तथा रिहाइको लागि प्रयत्नशील छन्। तर अहिले पनि मुख्य प्रश्न उस्तै छ — बिपिन जोशी कहाँ छन्? उनी कहिले फर्कन्छन्?